今年施政報告內本來有啲好事，尤其是教育界笑到四萬咁口：教育界功能組別議員葉建源如果在投致謝票中唔投贊成票，恐怕啲教師會話佢冇良心。乜唔係啫，全體CM轉做GM噃，施政報告第164段咁樣講。
「在教師專業發展方面，政府會在2019/20學年於公營中小學一次過把教師職位全面學位化，學校可因應校本情況，分兩年時間全面落實。涉及額外撥款約每年15億元。同時，為配合小學實施全日制和教師將會全面學位化的發展，政府會預留5億元經常撥款，以理順小學校長和副校長的薪酬，以及改善小學的中層管理人手。教師專業發展專責小組稍後會提交這方面的具體建議。」
所有中學教師，目前仍然係CM嘅，怎不喜上眉梢，由CM（文憑教師）變成GM（學位教師），薪水大有進益嘅嘛。公子L唔多明白：「乜教師有唔係大學畢業生（graduates）嘅咩？」好多人有呢個誤解，多得教育局唔少。左丁山做過津貼中學學校管理委員會委員（俗稱校董），知道教師擁有最多學位，大學畢業唔少得，教育學院教育文憑唔少得，教理科嘅有理科碩士，教文科嘅有文科碩士，還有教育碩士學位，一個教師隨時有三至四個學位（degrees），偏偏在人事編制上，仍然係Certificate Master，升唔到上去做Graduate Master，主因係教育局唔肯放水，以免增加津校教師之總薪酬支出。左丁山有個世姪，連港大博士學位都讀埋，都只係中學文憑教師，左丁山教佢與校長力爭，拉鋸一年，先至升到級，好多教師冇咁好彩，心懷怨憤，故此歷任教育局長不得人心，郁吓就畀人鬧，此乃原因之一。
今次林鄭大刀闊斧，一聲令下，全體CM學位化，皆大歡喜啦！唔知教育局內班官僚領導有無意見呢？可惜吖，楊潤雄局長不知何故，講句唔學普通話冇優勢，好似貶低廣東話，立即被圍剿，於CM變GM一事上，唔敢出來領功嘞。識普通話可以在大陸搵食，鬼唔知，香港人醒目到極，要到大陸做生意嘅，老早已練好普通話，使乜楊局長提醒，啲國際幼稚園已經老早用普通話教中文啦，局長何必再提呀！
林鄭特首之教育撥款加薪德政，本應鼓掌，點知佢份施政報告太着重講東大嶼，於是全城評論都只係講東大嶼，冇人理會教育界的開心了，未免可惜，加上楊局長講錯嘢，話送子女入國際學校，係因為佢「懶」，香港教育制度太複雜喎！咁都係一個送子女入國際學校嘅理由？教育制度複雜，教育局長有無責任理順呢？局長懶，就只好視而不見了。
呢日在街上見到一位已為人母嘅朋友，順口問佢：個女讀邊間學校呀？呢位阿媽話：「我都懶㗎，不過冇楊局長咁高薪，唔敢送女兒入國際學校，好彩入到本地學校聖心啫。」聖心有著名大賓架畢業，梁高、李慧敏噃，還有陳方安生呢，梗係名校啦，問阿媽：「聖心有乜特別？」佢話：「聖心聖心，勝在夠深，一年班讀二年班課程，讀早一年！」