林敏驄自編、自導的賀歲片《如珠如寶》，昨日在西貢拍外景，片中演員包括洪金寶、恬妞、杜宇航、林雪及李靜儀（Heidi）等都有現身。杜宇航與洪金寶、梁小龍昨日拍攝對打戲。
肥腫到286磅
《如》片講述壞分子林雪要對付老人院的主持人林敏驄，因而連累一班院中的長者。洪金寶笑言今次飾演院友，比過往打餐飽輕鬆好玩，洪金寶說：「今次做番自己，喺老人院生活，同梁小龍、杜宇航打少少，有冇搞錯喺老人院都仲打？不過，喜劇唔係真正武打片，好簡單。」洪金寶表示自拍完《五福星》系列後，絕少拍喜劇類型。
在片中飾演反派的林雪造型突出，獨眼兼一身黃金hip hop造型，林雪說：「今次做老闆，頸上條金鏈如果係堅，就有18斤重，條頸好攰，成日戴住頸椎都會有事。」體形超越洪金寶的林雪現在體重達286磅，他說：「最近重咗9磅，自己唔想去到300磅另一個層次，𠵱家手腳都腫腫哋，可能鍾意食鹹嘢去唔到水。」
Heidi制服心願
對於有否向洪金寶請教如何減肥，林雪坦言：「要減磅就唔使問意見，問自己捱唔捱到，我冇恒心、冇決心，同時覺得做嘢為兩餐，兩餐都唔食，似對唔住自己。」Heidi與杜宇航在片中同樣飾演漁護署職員，Heidi說：「自己一直好想着警察制服，今次算係還個心願。」Heidi還笑言自己本身沒喜感，身邊人指她後知後覺最好笑。
採訪：張俊銘
攝影：仇志德