國際賽完結，聯賽亦都重開，西甲嘅皇家馬德里處於各項賽事四場不勝，仲要一球都入唔到嘅困境，季前接替施丹執教嘅盧比迪古，帥位好快已經唔穩，據報佢近日被會長佩雷斯照完肺，未來兩個半禮拜皇馬嘅五場波，包括月尾嘅西甲國家打吡作客魯營對巴塞隆拿，就會決定盧帥使唔使下台。
皇馬喺西甲排第四，只係落後畀榜首西維爾兩分，不過「銀河艦隊」連續三場西甲失分，包括作客輸畀西維爾及艾拉維斯，而歐聯遠征俄羅斯又0:1輸畀莫斯科中央陸軍，最嚴重係連續四場冇波入，喺基斯坦奴朗拿度（C朗）離隊後陷入咁嘅入球荒，更加令到決意賣人嘅佩雷斯不滿。
近四場不勝零入球
西班牙《阿斯報》報道，佩雷斯近日同盧比迪古見面，清楚表明對佢領軍嘅要求同期望，而未來皇馬嘅五場波，包括三場聯賽同兩場歐聯，其實只係得月尾作客巴塞嘅國家打吡難踢，據報假如皇馬喺呢五場中有咩差池，或者喺國家打吡遭遇恥辱性大敗，都會令盧帥下台。
其實喺15/16球季，時任主帥賓尼迪斯亦身陷盧比迪古咁嘅危機，踢國家打吡前更盛傳被佩雷斯干預排陣，結果喺魯營慘吞四蛋，之後肥賓就被炒，由施丹接任。
反對巴塞美國踢西甲
講開巴塞，西甲賽會原本打算安排巴塞隆拿喺下年一月26號去美國邁阿密「作客」基羅納踢西甲海外版聯賽，皇馬就正式去信西班牙足總提出反對，仲話「每支球隊踢足主場同作客賽事係聯賽嘅核心元素，關乎完整性同公平」，而且皇馬仲鬧賽會冇任何通知或徵詢，未得皇馬同意咁話。其實，西班牙足總主席盧比艾利斯一早都表明反對每季將一場西甲移師美國踢，但歐洲足協、美國足總同北美洲足協都同意呢個海外賽安排，而巴塞同基羅納都冇問題咁話。