前英格蘭代表隊射手、目前效力美職聯（MLS）球隊華盛頓聯隊嘅朗尼，周三晚喺常規賽主場鬥FC多倫多嘅賽事，喺上半場射入靚絕罰球，取得自己登陸MLS以來嘅第10個入球，亦幫球隊奠勝贏1:0，剩番兩場常規賽，贏多一場就確定入季後賽。
當時係上半場18分鐘，華聯喺中路離門約35碼博得罰球，只見朗尼主射，皮球直飛龍門右上角網頂，呢個入球亦係佢為華盛頓聯隊取得嘅第10球。根據統計，朗尼生涯每效力一支新球隊要取得10個入球所需要比賽嘅場數，最短係佢第二次效力愛華頓時嘅16場，喺華聯就要18場，再之後係效力曼聯時嘅26場，至於朗尼第一次效力愛華頓時，就踢咗50場至取得10個入球。