前立法會主席、民建聯曾鈺成同社民連梁國雄長毛早幾年一齊拍攝電視節目《跟住矛盾去旅行》大收旺場，估唔到電視台又再添食，搵嚟同一組合去新加坡睇公屋，節目預告片已經上架，勁多人畀咗Like，相信呢對孖寶將會係另一次收視保證。
ViuTV今次嘅新節目《人住公屋我住公屋》，再次搵嚟曾鈺成同長毛合作，唔使再去冰天雪地嘅波蘭，反而去咗新加坡報睇公屋，眼見千幾呎樓只係300幾萬元，睇到曾主席都嘩嘩聲。身為土地供應專責小組成員嘅曾鈺成，相信到時對房屋政策都會有好多意見，究竟到時佢哋兩個有咩激辯？就要睇節目先知喇。
至於另一節目《買樓狂想#曲》都好叠馬，搵到上水鄉事委員會主席侯志強講樓，節目預告片中只係播咗侯強一句：「要乜鬼樓吖，要付出㗎做人」已經霸氣十足，相信節目中佢應該有其他金句偉論，真係令人期待。