立法會嘅暑假雖則早就放完，但係「暑假後遺症」呢家嘢可大可小。話說立法會噚日有個委員會開會，傾吓修改選舉法例，民建聯元秋蔣麗芸相當勇猛，積極舉手提問，佢問嘅問題仲殺咗政制及內地事務局副局長陳帥夫一個措手不及，完全唔識答，不過唔係陳帥夫冇準備，而係元秋有問題。
黨友都睇唔過眼
元秋係第一位提問嘅議員，除咗一啲技術問題外，佢突然間問，政府份文件就寫住話係今年6.27發出，然後又寫住6.29「立法」，質疑「（條法例）都未嚟立法會」，點立呀？
等八方解釋番，立法會有所謂三讀程序，即係政府寫好條法例就會刊憲先，然後喺大會首讀及二讀，讀完就畀內會傾吓成唔成立法案委員會，成立就畀法案委員會傾，傾完先上番大會做二讀辯論、三讀。其實呢個立法流程喺立法會網頁嘅「教育資源」就有，不過對象主要係市民，冇諗過做緊議員嘅人會唔知啫。
當時陳帥夫見元秋咁問，惟有口都窒晒咁話6.29個日子係刊憲，然後先首、二讀，連元秋黨友、議員資歷淺過元秋嘅張國鈞都幫口話二讀咗咪進入法案委員會咯。不過跌落地點都要揦番啲沙先嘅，元秋最後惟有同陳帥夫講，唔緊要，你返去改番個日子啦。好！八方放長雙眼睇陳帥夫點改。
李八方