巴塞隆拿球星美斯似乎對性嘅觀念一啲都唔保守，佢名下位於西班牙度假勝地伊維薩島嘅MiM Ibiza Es Vive酒店，今個周末就會舉行一個為期四日，專為女同志而設嘅性派對，聽講仲吸引咗過百位女同志報名㖭。
會有逾百位女性出席
其實美斯就唔係今次活動嘅搞手，佢嘅酒店只係租咗畀一個叫Skirt Club嘅私人女性會所搞活動箒。不過今次活動嘅收費就一啲都唔平，每人每晚收費要525鎊（約5,440港元），當然仲要係女性先可以參加啦。
據傳媒報道指，今次性派對除咗會開放套房畀一班參加者享受同探索性嘅樂趣之外，仲會租借埋酒店嘅酒吧同泳池畀參加者使用。據報已經有超過100位女士落實會出席派對，該會所仲形容參加者可以喺呢個「島上嘅天堂，無拘無束咁將佢哋嘅慾望同魅力釋放」，今次活動仲會設特別節目表演，幫助佢哋投入氣氛。主辦單位仲宣稱今次活動係「有共識下嘅實驗」冇後果需要承擔，最緊要享受。聽到呢度係咪突然覺得五千幾蚊一晚好抵畀呢？
巴塞出年東征中國
講返呢間酒店，當初美斯決定喺伊維薩島收購酒店，除咗係當係投資之外，其實都有啲私心嘅。事關美斯同佢太太安東莉娜都好鍾意呢個地方，經常會約埋蘇亞雷斯同法比加斯兩家人一齊去島上度假，所以就索性買間酒店邊做生意邊自用囉。不過酒店今個星期有個咁嘅活動，怕且美斯嫂都唔會畀佢老公過去喇呱？
講起度假，相信美斯同佢巴塞嘅隊友喺出年夏天都未必有好多時間休息，事關巴塞啱啱就落實咗出年夏季會東征亞洲，去中國同日本訪問。巴塞近年都同好多亞洲企業合作，例如日本樂天同Konami，又喺中國海口參與項目，包括興建巴塞主題展館。不過巴塞方面就仲未公佈會同邊幾支球隊踢熱身賽，想睇巴塞嘅朋友要等等喇。