星期一黃昏6點幾,曾先生行經深水埗鴨寮街,聽到有把女人聲大嗌:「偷嘢!」之後喺北河街十字路口,見到成班人圍住一個着白衫嘅男仔,個女人話佢偷咗兩支電筒,個男仔大聲抵賴:「我諗住買,但係唔記得帶銀包,𠵱家支電筒喺你舖頭!」個女人嗌報警,話等警察嚟先講,個男仔反問:「我做乜要等?」女人寸佢:「你心虛呀?」有街坊幫手捉住個男仔,咁啱有反黑組探員喺附近,之後通知軍裝到場調查。
曾先生話軍裝帶兩人返去舖頭,翻查店舖cctv後帶走咗個男仔。曾先生聽到其他檔主話,個男仔唔係第一次偷嘢,一個禮拜試過三次失手,星期日喺一間電話舖偷咗部電話,畀人捉到掉返喺檔口,人哋冇報警咋。
警方表示,當日接到鴨寮街一間賣電子產品嘅女負責人報警,話睇cctv見到有個男仔將兩支合共價值100蚊嘅電筒擺落個膠袋,冇畀錢走咗,於是追出去大嗌,對方將兩支電筒掉喺隔籬舖嘅貨架,警察拉咗嗰個涉嫌偷竊嘅27歲男仔。