兩間大學嘅醫學院一哥──香港大學嘅梁卓偉同中文大學嘅陳家亮，近日各領風騷獲醫學界殊榮。
港大周二發新聞稿，話醫學院院長梁卓偉獲選為美國國家醫學院院士，係十位外籍院士之一，表揚佢喺全球衞生、醫學教育嘅領導，同埋對傳染病學、疾控嘅貢獻。正所謂執輸行頭慘過敗家，中大噚日就出稿公佈醫學院院長陳家亮都獲美國腸胃科醫學院頒「國際領袖大獎」（International Leadership Award），係首位華人獲此殊榮，表彰佢喺國際腸胃病學上嘅貢獻及領導。估唔到喺攞獎方面，兩位一哥都鬥得難分難解。
大是大非前自動合體
陳家亮同梁卓偉喺2013年分別坐正中大同港大醫學院院長。53歲嘅陳家亮係兩個前世情人嘅童顏爸爸，喺香港土生土長，中大畢業嘅佢專攻腸胃醫學，之後返母校掌舵醫學院。
46歲嘅梁卓偉就係鑽石王老五，喺加拿大讀書，之後回流攞到港大醫學院博士，仲做過副局長、前特首曾蔭權嘅特首辦主任。
自從佢哋做咗院長後，兩間醫學院不時隔空過招。2015年中大推出「跳級制」畀超級尖子直升Year 2讀醫，被梁卓偉質疑係走捷徑，陳家亮當然反駁，但當年7個狀元最終入晒港大。事隔一年，陳家亮寫文暗示某院校用人盯人戰術收生，爭尖子爭到好似美容院促銷。之但係有大事時，兩位醫學界瑜亮就會「合體」，好似傘運初期就齊齊去金鐘探學生，仲早過兩大校長到場；中大醫學院院慶又玩合巹交杯，連衞生署防癌廣告都搵佢哋打孖上，即使禁電子煙亦同聲同氣。
籌款能力兩人叮噹馬頭，梁卓偉當年一上任就收齊李嘉誠10億捐款；2014年收養和醫院2,000萬捐款，舊年更獲馬會捐12.4億元建癌症中心。中大2014年都收過馬會13億起新醫學大樓；嘉華國際創辦人呂志和偏愛中大，2015、16年捐咗3,000萬資助中大醫學院。李超人就識做嘞，今年8月李嘉誠基金會捐一億推動基層醫療，港大中大各獲1,750萬，打個和，super！
李八方