香港傳媒高層訪京團團長蕭世和前日同中央政治局委員、中宣部部長黃坤明會面後，因為「講多咗」而搞出大頭佛，但港澳辦主任張曉明嘅心情，似乎冇受影響，趁住噚日重陽秋高氣爽，約埋一班港澳駐京嘅前線記者，共聚北京昌平天壽山下，係繼同行會成員兼民主思路召集人湯家驊浪漫賞櫻之後，又一力作，溫馨遊園。
港澳辦噚日發稿，話張曉明聯同副主任馮巍、聯絡司陳繼光，同一班港澳駐京記者交流在京嘅工作同生活。但佢哋唔係悶到爆坐埋一齊傾偈喎，而係一齊郊遊，參觀明十三陵景區、食農家菜之餘，仲一齊喺果園摘蘋果……應該冇特別意思啩。隨文仲附上靚相（圖），見到一班行家都笑容滿面，暫時放低記者簿，唔使抄筆記，同呢兩日有傳媒高層可能一額冷汗，形成強烈對比。