尋找返工的故事 - 曾志豪

尋找返工的故事 - 曾志豪

嘟嘟嘟嘟嘟嘟嘟嘟,呢個地方嘅打工仔,為咗返工,無論要排幾長嘅人龍、等幾多班不會埋站嘅列車、逼上幾焗幾多臭汗嘅車廂、等待無止境無盡頭嘅行車時間,都阻止唔到佢地返工嘅決心。
究竟係乜嘢驅使呢個城市嘅人,咁熱心返工呢?
點解佢地返工要返得咁辛苦呢?
希望工程,除咗幫助山區小朋友返學讀書,會唔會協助呢個城市嘅打工仔,順利返工呢?呢一集,尋找返工的故事,我地嚟到香港呢個城市。
阿強人如其名,意志堅強,佢上次颱風山竹襲港,癱瘓全城,塌樹阻路,佢決定仿效唐三藏到西天取經嘅堅毅,逢山開路,遇水搭橋,見樹跨過。係咁艱難嘅環境,究竟係乜嘢支持住佢永不放棄呢?阿強話,「係老細,只要一諗起老細,就算前面係火焰山,都會毫不猶疑咁跨過去。」老細係香港打工仔心目中,已經唔係人,而成為咗一種信念,支持佢地踏上返工嘅道路。點解老細有咁大嘅魅力?阿強話,因為老細會扣勤工獎,仲會出警告信,所以每當阿強感到絕望,例如成條將軍澳隧道癱瘓時,佢就會用「勤工獎」來激勵自己向前。
阿祥平時只係需要45分鐘就返到公司,但港鐵四線癱瘓嗰一日,佢足足用咗三小時,即係180分鐘,即係可以由香港去一轉日本/泰國/台灣,先至返到公司。佢返工嘅信念就係,「當自己唔係坐港鐵,而係坐高鐵。三個鐘車程,當自己去咗武漢囉。」
阿王知道港鐵會為大四喜訊號冚家故障而作出補償,就係擇一日半價乘搭,佢覺得好嬲。「你去茶餐廳如果出碟餸出遲咗成三個鐘頭,我估任何一個老細都會話,呢餐免費當我請。點會話請半價咁鐸㗎?」
有咩要同政府講?「如果啲官可以搭一次港鐵而準時返到中環,我就服佢。」