香港傳媒高層搞訪京團，《蘋果》就肯定冇份，不過各大傳媒高層點會唔參加，通常京官會借呢啲機會同班傳媒高層「深入溝通」，講講北京對港媒有乜期望，班傳媒高層見完京官，亦例牌會公開講兩句京官講乜，不過今次嘅團長、星島集團CEO蕭世和，竟然將唔可以講嘅嘢公開講埋，話中央希望香港媒體唔好成為干擾內地政治基地，結果搞到一眾香港傳媒要抽起有關報道，認真尷尬。
傳中聯辦指「內部言論不可公開」
今次訪京團成員包括無綫助理總經理袁志偉、有線電視執董趙應春、《信報》總編輯郭艷明等，話說佢哋噚日同中央政治局委員、中宣部部長黃坤明會面，會後蕭世和見記者時，被問到有冇講馬凱事件時，蕭引述黃坤明話，希望香港媒體唔好成為一個干擾內地政治嘅基地，又話黃重申有一國嘅原則之下，先至生出一國兩制，希望香港媒體恪守一國兩制原則及發揮正面作用，例如多採訪報道大灣區。當時無綫有直播，一眾傳媒高層企係蕭後面，個個冇出聲反對。
不過有傳中聯辦之後「下旨」，話香港媒體唔好成為干擾內地政治基地呢句係內部言論，唔可以公開，各大傳媒立即抽起有關報道當冇講過。好似商台同《經濟日報》旗下網媒《TOPick》，懷疑將整條新聞抽起，其中商台最新報道，只用蕭世和嘅相，內容來自通訊社，冇引用蕭嘅說話。而《信報》標題將「中宣部冀港傳媒勿成干擾內地政治基地」，改為「中宣部冀港傳媒推動香港融入內地發展」。據知廣播處長梁家榮都係團員，港台報道未見爭議一句。
李八方