沙田陳太到新城市廣場買一個Mango Dome蛋糕，售價380元，拿回家中做生日蛋糕，請孫仔孫女食，各人吃得非常滿意。Cova嘅Mango Dome確實十分可口，至於價錢貴唔貴，就睇自己荷包喇！譬如去東海堂、聖安娜、美心買蛋糕，價錢起碼便宜四至五成，但放在IFC呢，380元只係起標價！Lady M、Dalloyau嘅蛋糕起碼要接近360元，Robuchon嘅玫瑰蛋糕Rose Cake好似係賣700多元，呢隻蛋糕顏色鮮艷，左丁山每次經過Robuchon都忍唔住望吓，但想吓買一個一百美元嘅蛋糕返屋企畀家人食，一定畀老婆鬧大花筒，始終冇買過。
估唔到陳太還會由蛋糕價錢想到通脹與退休，果然係經濟系畢業生（一級榮譽）嘅反應。陳太話：「一九六幾年，我哋一家九口住在鰂魚涌一間唐樓，約六百呎，月租就係350元，想唔到五十年後，350元只夠買一個一磅蛋糕！想當年，英文中學畢業生考政府初級文員，月薪都係三百五，現在係幾多呀？」上網翻查資料，今年8月中，政府招聘臨時初級文書助理，中四程度，月薪一萬三千多元，中學畢業生（DSE考試五科2級包括中英文）可申請助理文書主任，月薪一萬四千多元。陳太話：「政府之月薪五十年來上升40倍，現於鰂魚涌租間六百呎，怕要二萬銀啩，即上升57倍，所以話，我哋老咗退休，如果退休金不與通脹掛鈎，又夠長命嘅話，一定會成為貧窮戶。」
睇吓有幾多退休金啦，但即使在1987年揸住三百萬（當年都幾多錢㗎嘞），差唔多夠買三個沙田第一城560呎單位。如買晒定息債券，今日食息都要好慳儉至得，但如果當年買咗恒生、中電，長揸不放，今天仍然可以笑呵呵，得閒可以買個Mango Dome食吓。沙田陳太又揸住啲乜呢？佢話私隱問題，唔講得咁多，要訣就係選擇有高息（5％或以上）嘅證券，暫時以REITs為主。REITs實質上係收租股（例如冠君，持有花園道商廈與朗豪坊收租），而租金與通脹掛鈎，一般而言，息率不會低過通脹，又例如一隻商業信託港燈（2638），每年派息4毫，電費幾乎年年調整，與通脹亦步亦趨，香港人未來30年會唔會減少用電呢？你自己諗吓。反而持有工商業股就有風險，美國百年老店Sears剛申請破產，通用電氣GE曾經叱吒一時，今日已被道瓊斯剔除，可知股票名氣不是派息保證，大家要小心揀。