有西九「東大門」之稱嘅戲曲中心將會喺出年1月20日正式開幕，西九噚日喺戲曲中心中庭搞咗個新聞發佈會，西九管理局董事局主席唐英年同行政總裁栢志高都在場，而粵劇界重量級人物白雪仙都獲邀出席，仙姐由慈善基金副主席陳培偉醫生陪住登場，上台影大合照嗰時企喺仙姐隔籬嘅唐英年表現得甚為熱情，唔單止笑到四萬咁口，又搭晒仙姐膊頭，好肉緊咁捉住仙姐手仔教佢影相嗰時畀「like」，唔通唐唐都係仙姐小fans？定係佢哋真係老友鬼鬼？
唐英年雖然喺大合照時表現輕鬆，但致辭時就多次「食螺絲」，對住份稿都講到一嚿嚿，例如提到多謝特區政府，佢就講成感謝「香港特區行政……特別行政區政府」對戲曲中心同整個西九文化區項目嘅大力支持，真係聽到人一額汗。