想當年，新亞新聞系一位師兄W追同系低一班嘅女同學Y，農圃道校園好細，呢件事係人都知。某年某月某日下午，師兄W在英文虎報做實習，因有突發新聞，返唔到農圃道，嗰陣時又未有手機傳呼機傳資訊，無法通知女同學Y取消約會，於是發揮無窮想像力，係咁在報館打電話返宿舍搵到人通知左丁山，唔該暫時陪住Y同學，等佢回來。左丁山勝在多口，搵到Y小姐，與佢坐在籃球場邊睇大學四角籃球賽（即港大、新亞、崇基、聯合四校，當年中大三間書院唔肯組成一隊中文大學隊，每逢與香港大學舉行體育比賽，都係四角賽，但又不時打贏港大噃），嗰陣時新亞籃球隊有陸潤棠、張建雄（張總）、李明逵、曾儒聖等在陣，幾打得㗎。）嗰日在籃球場邊傾吓傾吓，傾到日落西山，與Y小姐談笑甚歡，師兄W仍未出現。幾位同學見到以為左丁山想橫刀奪愛，背後唱到左丁山面黃。卒之天色已黑，師兄W氣急敗壞咁走到返嚟，對Y小姐沙冧鞠躬，左丁山當然即刻成為陳大文。
眨吓眼過咗近五十年，師兄W與Y小姐結婚亦四十餘年，有兩位千金。大千金係標準靚女，嫁咗一位法國賓架，上星期W太生日之期，在沙田馬會請吃晚飯，點知法國女婿話在中環放工遲，坐地鐵入沙田好辛苦，可能唔會加入，左丁山得知，就通知呢位賓架P坐順風車，車佢返沙田。賓架P第一次與左丁山同坐一車，傾談三十分鐘，先知佢已來港十年，在巴黎大學得經濟學學士學位，又到英國讀數學碩士。法國人素來數學了得，轉系幾容易，換轉係香港學生，讀完經濟然後讀數學，真係幾艱難。賓架P話好彩有此轉變，搵工唔難，畢業後就搵到金融機構工作職位，專做數學財經模型（計量金融），後來轉做電腦交易程式，如果純讀經濟，賓架P話在巴黎幾易畢業即失業㗎！十年前金融海嘯，不少法國人不約而同移居香港，賓架P就係其中一位，到港後，有啲運氣搵到外資ibank做有關AI交易方面嘅研究工作，佢話如果留在法國，好難有此突破機會，因為2008年之後，所有歐洲銀行表現差勁，輸晒畀美資行。於是左丁山問佢：香港大學生叻仔叻女多數讀商科，你請唔請呀？賓架P大笑：「現在我每年審閱見習生申請書，前幾年注重數學與計量金融，呢兩三年以至未來幾年，會集中考慮電腦科學，data science等主修生，對商科生嘅優次排得幾低。做銀行交易員，推銷財富產品現時完全講big data，用大數據分析，讀商科而唔讀電腦，等於廢了武功。商科好易在職訓練，電腦程式就要由大學訓練呀。」唔怪得中大率先要注重STEM教學及收生，高中學生選科要仔細考慮新形勢。