意大利周日喺歐洲國家聯賽A3組作客憑後衞基斯坦奴比拉基補時入波，以1:0絕殺波蘭，結束各項賽事五場不勝走勢，係意大利今年出賽九場以來首次保持不失波。另外，今場亦係主帥文仙尼自5月上任以來喺具競爭性賽事取得嘅首場勝仗。文仙尼賽後呼籲球迷對佢同國家隊要保持耐性，佢係唔能夠好似巫師咁一下子令球隊得到改善嘅。效力費倫天嘅基斯坦奴比拉基，入波後就向天做出特別嘅手勢，右手舉起食指、左手就舉起三隻手指，將入球獻畀今年3月因心臟病發逝世、着13號波衫嘅前費倫天拿隊長艾斯托利。至於波蘭，輸波後就成為首支篤定降班嘅歐國聯球隊，主帥巴斯錫克賽後坦言係自己出任波蘭國家隊教練以來踢得最差嘅一場，如果唔係施捷斯尼屢救險球，肯定會失更多波。
施捷斯尼嘅祖達斯隊友基斯坦奴朗拿度雖然繼續喺葡萄牙今個國際賽賽期免役，但葡萄牙（白衫）仍靠2016年歐國盃決賽奠勝英雄艾達，事隔兩年多後再為國家隊入波，加上狼隊小將希達哥斯達處子登場就成功取得士哥，作客友賽以3:1輕取蘇格蘭，今個賽期兩戰全勝。