喺機場做嘢嘅鍾小姐，前晚放工搭機場巴士返屯門，10點幾經過安定輕鐵站，見到有個女人瞓咗喺去屯門碼頭方向嘅路軌上。鍾小姐最後同另一位途人幫職員手，合力抬個女人去路面。
鍾小姐話佢見到有人喺路軌嗰陣，其實在場有唔少途人，但就冇人行埋去，因為唔知個女人有冇受傷，唔敢亂郁佢。距離個女人唔夠10米，有架準備入站嘅輕鐵及時停車，司機落車行落路軌，叫鍾小姐同另一位男途人落去幫手，三個人齊齊將個女人抬上去附近巴士站路面。
鍾小姐話個女人仲有知覺，冇幾耐救護車到場，個女人話因為跌咗銀包落路軌，所以落去執。不過鍾小姐話聞到佢好大酒氣，見佢set頭又化妝，着連身裙加外套，估佢可能去完飲同埋飲大咗。警方證實，女事主63歲，飲醉酒落路軌執嘢點知瞓咗落路軌，並拒絕去醫院檢查。