香港作為國際大都會，仍然未就消除性傾向歧視立法，立法會支持力量仲係較薄弱，當中最積極嘅當數人民力量陳志全，佢噚日喺政制事務委員會話今年《施政報告》相關措辭第一句寫明：「特區政府一直致力在維護現有一男一女、一夫一妻的婚姻制度的基礎上，促進不同性傾向和跨性別人士的平等機會」，令好多性小眾失望，「好似落咗閘咁」，強調性傾向歧視條例、同性締結伴侶關係，以及同性婚姻嘅層次唔同。
原來有呢個諗法嘅唔止陳志全，連新民黨葉劉淑儀都開腔力撐，佢話提唔提維護一男一女婚姻制度根本冇需要，仲話政府怕事，「可能你哋驚得罪傳統人士，以為支持性小眾就影響傳統婚姻制度」，繼而寸爆指，婚姻條例有關一男一女終身結合嘅定義喺現代社會都受衝擊，「（呢樣）同性小眾人士無關；好少人for life做得到、冇第三者亦好多人做唔到」，又指當局應向教育界着手，「會唔會有老師認為好唔正常係一種病？」認為可由學校開始做起，教育學生令佢哋自小就唔好歧視性小眾。