特區政府一直宣傳搭高鐵返大陸又快又方便，不過要方便到好似政制及內地事務局常任秘書鄧忍光咁，可以冇回鄉證同香港身份證一樣搭到高鐵返香港，怕且唔係個個人得，自然令市民懷疑，係咪因為佢係高官，所以可以「特事特辦」，鄧忍光噚日認自己論盡，但唔認有用乜嘢特權，佢只係跟口岸人員指示做喎！
《明報》噚日報道，話9月22日舉行高鐵開通儀式當天，鄧忍光係其中一個主禮嘉賓，喺開通儀式之後，就坐西九龍站前往廣州南站嘅列車北上，並於當日回程，不過鄧忍光回程嘅時候唔見咗回鄉證及香港身份證，但佢行到一地兩檢關口，只show個冇印個人資料嘅高鐵開通儀式嘉賓證，同有佢名字嘅高鐵車票，就獲邊檢人員放行。
「聽口岸人員指示」
好多香港人都知，如果港人遺失證件，必須喺內地辦理一次出境通行證，最快都要一個工作天，冇得即日處理。
鄧唔單止唔使一次出境通行證，直情show個嘉賓證就可以過關，話冇「特事特辦」邊有人信！而事件嘅主角鄧忍光噚日去立法會開會，立即俾記者捉住問呢單嘢，佢認自己論盡跌咗回鄉證同香港身份證，但就唔認自己有特權，話作為旅客只係聽口岸人員指示做足所有嘢，不過如果佢唔係常秘，你估啲口岸人員會唔會咁順攤畀你冇證出入境？
李八方