特首林鄭月娥新一份《施政報告》，打工仔其實算有唔少喜訊，包括將法定產假延長4周至14周，女性政府僱員仲即時受惠。
勞工及福利局局長羅致光（CK）噚日喺個人網誌上載一張寫有「成功爭取」字句、與「同名」嘅公務員事務局局長羅智光合照（圖），透露「成功爭取」嘅人其實係一位年輕女公務員。
CK曾喺8月26日網誌就香港同海外嘅產假安排作出分析，佢話網誌發佈後翌日喺政總飯堂午膳時，有位年輕女公務員就走去問佢，政府研究增加產假時，係咪可以考慮畀公務員早啲實行？結果佢飯後返辦公室後就發電郵畀娥特，探討意向，當晚約10點已收到娥特嘅正面回應，隨後佢仲同「另一位」羅智光局長商討提早為公務員實行延長產假至14星期，經過幾番討論就落實。