「佔中三子」之一嘅中文大學社會學系副教授陳健民，一早預告因為佔中案面臨入獄，所以打算放低喺中大已經執起四分一個世紀嘅教鞭，考慮向中大申請提早退休。佢仲諗住趁佔中案下月19日開審前，以「毋忘燃燈人──向啟蒙者致敬」為題演講，親口向一眾學生交代去向。
公眾可報名參與
中大喺佔中案開審前5日、即11月14日舉辦「博群大講堂」之「思托邦」第十四講，正正由陳健民主講，喺呢個時候演講，唔通呢個係佢告別中大之作？八方問過陳健民，佢笑笑口話：「應該都係啦！」因為案件開審後都無辦法上堂，要搵人代課，但佢又賣關子，唔肯講係咪已經向校方提出申請，話希望演講當日可以親口向眾人交代。
外界預料佔中案明年初有判決，一早做好心理準備要入獄嘅陳健民話，今次演講主題由佢自己提出，希望同學生分享邊啲人或者作品影響到佢參與社會運動，「講吓點解我會關心民主問題、我覺得將來有乜問題係好重要啦」。佢話退休消息一出，已經有唔少舊生同佢講唔捨得，知道演講題目嘅人仲特登text佢，「有啲人話我係佢哋嘅啟蒙者」，佢都覺得好開心。
陳健民作育英才25年，必定桃李滿天下，呢個演講開放畀公眾，有興趣嘅人記得從速報名嘞！
李八方