求驗客手記：直布羅陀正賽開齋喇 - 求驗客

上星期六嘅歐洲國家聯賽D級第四組賽事，小國直布羅陀喺正式賽事連輸22場後終於贏波，爆大冷作客以1:0擊敗有阿仙奴球星米希達利恩壓陣嘅阿美尼亞。人口得34,000人、國際足協世界排名198位嘅直布羅陀，自2013年加入歐洲足協後曾經多次大敗，包括喺上屆歐洲國家盃外圍賽以0:7同1:8不敵波蘭、再分別以0:7輸俾德國同愛爾蘭，最大敗仗則係2017年喺世界盃外圍賽俾比利時狂數九蛋。

不過，今場作客對阿美尼亞，主隊雖然總共射咗35次門，控球率亦達72%，但直布羅陀門將高雲成功撲救10次，加上客軍於50分鐘博得12碼後由隊長捷普連拿主射破網，直布羅陀結果以1:0小勝阿美尼亞，喺正式賽事首度報捷。今場亦係直布羅陀繼2014年友賽贏馬耳他，同今年友賽戰勝拉脫維亞後嘅第三場勝仗。