噚日朝早差唔多10點，讀者莊先生搭巴士去銅鑼灣摩頓台總站落車，諗住行去維園，經過香港中央圖書館嗰陣見到有個伯伯瞓咗喺馬路，有救護員幫佢急救緊，而一架新巴就停咗喺馬路，原來新巴撞倒過馬路嘅伯伯。
嗰部新巴係8P路線，由小西灣藍灣半島開去灣仔北，事發嗰陣，新巴沿住高士威道西行，去到中央圖書館對開，撞倒過馬路嘅84歲岑伯伯，岑伯頸痛同埋膝頭哥擦傷，由救護車送院時仍清醒。
莊先生話見到車長喺現場協助調查嘅時候，表現得好擔心伯伯嘅傷勢，要阿Sir拍膊頭安慰。莊先生仲話，現場都幾多途人圍觀，大家都竊竊私語，話附近有交通燈過路設施，但懷疑有人冇喺正確過路處過馬路而俾巴士撞倒。警方調查緊意外原因。