求驗客手記:吞荷蘭三蛋 今年輸足五場德國真羞家 - 求驗客

求驗客手記:吞荷蘭三蛋 今年輸足五場
德國真羞家 - 求驗客

今夏喺世盃恥辱性包尾出局嘅德國,保得住帥位嘅教練路維口講改革,但成效似乎麻麻。上星期六,路維帶領德國喺歐洲國家聯賽A級第一組作客荷蘭,德國全場21次攻門都冇波入,反而淨吞荷蘭三蛋,錄得今年嘅第五次輸波,平咗1956同1985年單年輸波最多嘅紀錄;反觀荷蘭就破咗對德國16年不勝嘅魔咒,教練朗奴高文仲話荷蘭足球見到曙光㖭!

荷蘭破16年不勝德軍魔咒

自2006年接替奇連士文嘅路維,上星期六帶領德國出戰第168場賽事,超越咗名帥夏貝加,成為領軍德國場數最多嘅教練。雖然今場係路維嘅執教生涯里程碑,不過已經連續缺席兩項大賽嘅荷蘭,矢志反彈下踢得虎虎生威,上半場唔只守得住以湯馬士梅拿為首嘅攻勢,踢到30分鐘,仲憑前曼聯球星迪比角球助攻華基爾雲迪積克頂入領先。
下半場路維雖然先後換入利萊辛尼同達斯拿加強攻力,不過就曝露咗更多空位畀荷蘭,先有迪比喺完場前四分鐘接應橫傳射成2:0,後有韋拿杜姆喺補時個人突破建功,幫荷蘭以3:0大勝德國,仲領荷蘭成功喺歐國聯開齋,更力壓對手升上A1組第二,僅落後榜首嘅法國一分,反而德國就排包尾。

荷蘭於賽後為名將古積特(左)及雲達華治(右)送別。路透社

賽後路維就話球隊冇自信:「失波前我哋仲踢得幾好,最大問題係把握唔到機會,如果我哋領先嘅話會踢得有信心啲,但失波之後,你可以睇得出我哋冇乜信心。如果輸0:1係可以接受嘅,但最後10分鐘崩潰真喺唔掂囉!」贏波嘅荷蘭教練朗奴高文就話:「今場贏波畀到球隊好大信心,證明我哋可以踢好波,今場我睇到荷蘭足球有光明嘅未來,成個荷蘭都需要今場勝仗反彈!」至於加盟曼聯後曾被指水貨嘅迪比,今場交出入球助攻各一,表現翻生令到唔少球迷嗌摩連奴回購佢!不過摩佬又係咪可以激活迪比先?至於先開紀錄嘅隊長雲迪積克賽後疑似受傷,官方證實嚟緊星期二荷蘭鬥比利時嘅友賽唔使預佢囉!