英格蘭上星期五晚喺歐洲國家聯賽A級第四組賽事，作客克羅地亞只可以互交白卷。今場比賽因為克羅地亞俾歐洲足協（UEFA）罰，只可以閉門作賽，兩隊喺上半場都冇乜機會，最接近嘅一次係英格蘭嘅艾歷迪亞接應角球頭槌攻門，可惜個波中柱彈出。易邊後，兩隊喺早段都有入波機會。先係主隊中場比列錫嘅一腳射門俾三獅門將比克福特瓦解，後有英軍隊長哈利卡尼接應罰球頭槌攻門頂中楣。兩隊最終踢成0:0完場，英格蘭唔能夠報今夏世盃準決賽嘅一敗之仇。克羅地亞同英格蘭目前喺歐國聯A級第四組都各得一分，前者因為曾經慘吞西班牙六蛋，喺得失球差方面比較輸蝕，暫時喺小組排榜尾。英格蘭下星期一會喺歐國聯作客硬撼西班牙，克羅地亞同日會喺主場友賽約旦。