應屆世界冠軍法國喺禮拜四晚嘅友誼賽，憑後備上陣嘅基利安麥巴比完場前射入12碼，最終喺主場2:2逼和冰島，將國際賽不敗紀錄增至14場。賽前被睇低一線嘅冰島靠中場比卡比查拿臣同埋中堅卡利阿拿臣嘅入波，一度領先2:0。法國落後兩球後如夢初醒，隨即調入麥巴比增強攻力，直至86分鐘終見成效，麥巴比底線窄位勁射，省中冰島後衞伊祖夫臣擺烏龍入網，四分鐘後再親自操刀12碼中鵠，以2:2逼和對手幸保不敗。
西班牙二線兵攞「威」
法國呢邊和得驚險，但派出二線兵上陣嘅西班牙，就好輕鬆咁作客大勝有翼鋒加里夫巴利缺陣嘅威爾斯4:1。狂牛教練安歷基今仗大幅輪換，除咗正選門將迪基亞、隊長沙治奧拉莫斯同前鋒艾華路莫拉達外，其餘球員都非國家隊常規正選。狂牛兵團憑前鋒柏高艾卡沙梅開二度，加上拉莫斯同埋馬斯巴查嘅入波，一度領先4:0，最後東道主威爾斯僅憑禾基斯頭槌「破蛋」。
