意大利周三主場友賽烏克蘭，結果領先一球下被對方逼和1:1，近百年嚟第一次連續五場主場贏唔到波，睇嚟藍戰士嘅復興之路仍然係長路漫漫。
鋒線弱遭烏國逼和
意大利上一次連續五場主場不勝，已要數到1923至25年嘅事。喺今次國際賽期入面，教練文仙尼未有徵召「契仔」巴洛迪利同拖連奴前鋒比洛迪，反而召入冇國際賽經驗、同樣喺球會入球率不高嘅烏甸尼斯前鋒拿沙格拿及森多利亞嘅基安魯卡卡柏里。藍戰士過去一年嘅入球能力未有改善，不過文仙尼賽前就強調球隊的攻力冇問題，但結果就應該大部份「意粉」都唔係咁滿意喇。
藍戰士今場攻勢就夠晒多，全場命中目標嘅射門多達七次，係上年六月對列支敦士登嘅世盃外賽事以嚟最多中目標埋門嘅一次，不過意大利嘅入波就要等到55分鐘，由貝拿迪斯治接應費奧辛尼傳送後射入。不過意大利始終未能夠獲得最後勝利，烏克蘭七分鐘後就靠一次角球攻勢，由馬利路夫斯基半窩利抽射破網扳平。之後雙方未再增添入球，結果以1:1和氣收場。
文仙尼死撐有進步
連同今場賽事，意大利近14戰只得一次入多過兩球，而文仙尼上任後除咗第一場贏沙地阿拉伯2:1之外，近五場亦未贏過，不過佢賽後就表示球隊已經一直進步緊：「每位球員都向前踏出咗一小步，我哋今場頭60分鐘都踢得好好，只係經過大量嘅換人之後，令我哋有一段短時間失去方向，換人經常會成為一場比賽嘅關鍵時間。」
文仙尼又話明白到球迷嘅失望，希望喺下個禮拜日對波蘭嘅歐國聯能夠打開勝利之門：「球迷明顯因為我哋未能贏波而感到失望，但我哋唔應該在意球迷嘅喝倒采，我哋今日整體表現好好，假如今場可以射入第二球嘅話，球迷一定會為我哋嘅表現感到滿意。今場只係一場友賽，我希望意大利可以喺嚟緊禮拜日贏波。」