特首林鄭喺噚日發表嘅第二份《施政報告》，話為咗基層一定要用成4,000億係東大嶼填海起人工島，不過好多市民同網民引用天文台前台長林超英計嘅數，就算政府冇特登計少數同埋超支，都要成萬億先埋到單，剛好燒晒香港財政儲備，個個梗係即時反對。社民連今日就推出短片，搵嚟副主席周諾恒（Jaco）旁白，以及成員「阿牛」曾健成化身「海豚牛」，反對起人工島，一班連登仔發起整「長輩圖」，想游說長者為自己為子孫着想，一齊反對人工島。
想當年 西九填海起豪宅
社民連條片由阿牛身穿海豚裝扮「海豚牛」，阿牛話社記搵佢扮海豚，只因佢自細已識扮海豚叫聲，唔少黨友聽過都覺得好似，所以邀請佢飾演海豚一角。至於旁白Jaco喺片中話，香港並唔係冇地，粉嶺高爾夫球場、閒置軍事用地等都唔只2,000公頃，又話政府當年西九填海，亦話因為要改善市區居住空間，但結果填出嚟嘅地變晒豪宅、故宮，重建區街坊就丟晒去天水圍。
除咗社記，有連登仔覺得太多親政府媒體為「明日大嶼」隱惡揚善，所以發起一齊整「長輩圖」，要將「明日大嶼」有幾荒謬絕倫向長者宣揚開去。八方睇佢哋整嘅「長輩圖」都插得幾應，好似話寧用一萬億起人工島，都唔加長者生果金；又話一萬億等於幾多？就等於老友記兩蚊搭巴士搭1,000年、52年公屋免租、同埋起250間新醫院，長者唔使再排咁耐街症，八方覺得呢班連登仔幾有計！
李八方
