會計界議員梁繼昌上屆喺施政報告致謝動議，同兩名專業議政黨友葉建源同李國麟投下支持票後，唔少人都關注佢嚟緊嘅投票取態。梁繼昌今日同傳媒聚會時就話，專業議政議員唔會綑綁投票，佢自己則會先就報告嘅爭議性題目，包括全面禁止電子煙、三隧分流、東大嶼填海等問題諮詢選民意見，再作出個人投票決定。
未決定係咪支持填海
其實為咗同業界交代任內工作，梁繼昌最近已搵設計師整咗本靚靚工作報告，派畀界內四萬幾個選民，封面係佢向前跑嘅動作，寓意業界最緊要係「Keep Going（不斷前進）」喎。梁繼昌又話，政府喺土地供應專責小組未出報告，就公佈東大嶼填海計劃，做法係好唔理想，話自己可以代表專業議政嘅議員講，並唔反對維港以外填海，但對是否支持東大嶼填海計劃未有決定。講起689早前被傳有意「捲土重來」選特首，曾遭689入稟控告誹謗的梁繼昌就話，唔排除689因為不甘寂寞再選特首，但佢就覺得689身為退休特首兼全國政協副主席，應該專注國家事務，而唔係香港事務喎！