港鐵廣告都叫乘客搭扶手電梯嗰陣暫停用手機，避免分心，有乘客搭扶手電梯顧住睇手機，差啲搞出嚴重意外！鄧先生放工喺港鐵西鐵綫尖東站搭車，由大堂搭扶手電梯落月台嗰陣，突然間嘭一聲，聽到有女仔大叫，喺電梯底向前仆低。
鄧先生話喺後面睇，初時以為個女仔隻腳畀電梯扯咗落去，直至個女仔自己掹返隻右腳出嚟，先知原來隻鞋揳咗落扶手梯，好彩冇夾住個女仔隻腳。之後個女仔去搵職員幫手，企喺一邊等職員攞返隻鞋出嚟，佢都好尷尬，知道因為自己顧住睇手機，到咗都唔知而出事。
港鐵發言人話，事發係星期二傍晚6點10分，尖東站職員喺控制室見到訊號燈着咗，顯示一條由大堂去月台嘅扶手梯停止運作。職員去了解，見到有隻鞋揳喺扶手梯嘅梯梳同梯級間，所以啟動咗安全裝置。
乘客冇受傷，扶手電梯表面冇損毀，事後安排電梯承辦商檢查。港鐵呼籲搭扶手電梯嘅乘客，緊握扶手、避免企得太近梯邊。