效力辛尼特嘅俄羅斯國腳高哥連上季嘅表現唔錯，不過呢位27歲前鋒日前涉嫌喺一間咖啡店襲擊一位俄羅斯高官，唔單止可能被球會踢走，仲要面臨長達五年嘅牢獄之災，職業生涯隨時毀於一旦。
近日網上流傳出一段閉路電視片段，一位身穿黑色連帽衞衣、被指係高哥連嘅男士，突然走向一位坐喺咖啡店角落、身穿西裝嘅男子，隨手拎起一張木凳，然後狠狠打落對方個頭。對方隨後企起身懷疑同襲擊者口角，隨即多名在場人士分開兩人並了解事件，不過其間有人趁亂加多一拳打中被襲者，有消息指另一位施襲者係卡斯洛達中場馬馬耶夫。
體育部長辛尼特齊譴責
俄羅斯報章就指被襲者係華裔嘅俄羅斯工業及貿易部官員Denis Pak，但喺今次事件中，最後就有兩名高官需要送院接受治療，有指Denis Pak被打爆牙兼面部有兩處傷痕。
警方正調查緊呢宗毆鬥，暫時未有透露任何詳情，不過高哥連已經受盡各界譴責，俄羅斯體育部長高洛布哥夫仲話，如果證實有球員違反體育道德及涉及暴力，將會被永遠逐出國家隊。至於辛尼特之後亦發表聲明譴責今次事件，強調事件相當嚴重，唔排除會嚴懲高哥連。
疑醉酒或用藥鬧事
有咖啡店店員就向記者透露，高哥連同馬馬耶夫當時懷疑係飲醉酒或用藥以致神智不清，而俄報章引述一位當地律師指，假如高哥連一經定罪，最高會被判處五年徒刑。
雖然高哥連喺球壇就唔算太出名，不過佢都算係是非多多，早喺15年就有一位俄羅斯AV女星公開向高哥連「挑機」，指如果佢可以喺球季結束之前射入五個聯賽入球嘅話，就會同佢「激戰」16個鐘。雖然高哥連喺15年上半年只係入得一球，不過成個2014/15球季計就一共射入八球，到底嗰位女星最後有冇同高哥連激戰，就不得而知咯。