娥特噚日公佈《施政報告》，當中包括要用成四、五千億公帑嘅「明日大嶼」人工島計劃，呢個計劃其實係前特首老董嘅團結香港基金會支持，之前仲搵有「民間特首」之稱嘅劉德華為佢哋拍嘅宣傳片聲演，搞到「民間特首」俾人鬧爆，娥特噚日下午出席《施政報告》記者會，就開聲力撐劉德華，話佢同劉華係同一代人，覺得啲人鬧劉華唔公道，仲不惜喺咁多傳媒直播嘅政府記者會入面，公開祝劉華12月演唱會成功！
讚劉華勇於表達意見
娥特噚日自爆，話團結香港基金推出呢段片前約一、兩日，已率先將劉華段片畀佢睇，佢話當時睇完段片，覺得同佢《施政報告》理念好脗合，用字都好接近，「譬如前行、譬如希望，譬如啱做就做、要行就行，呢啲全部都喺2018年《施政報告》出現過嘅字，但係冇夾過，我肯定話畀大家聽，係冇夾過」。
雖然段片內容同佢《施政報告》撞晒，但娥特話冇諗過係咪政府有人洩密，佢認為因為佢同劉華諗法相似，大家都生長喺香港騰飛年代，都係出身基層，受惠於香港經濟發展，同埋都有香港人拼搏努力精神，又不忘借劉華讚自己，話自己可以講喺政府入面係成功啦，華仔喺演藝界係非常成功啦。
娥特跟住仲幫劉華抱不平，話段片出咗後，好多人喺社交媒體「對劉先生有人身攻擊，有啲侮辱佢啦」，話覺得啲網民咁做「係非常唔公道」，力撐劉華話：「我喺度對於劉先生能夠勇於表達佢嘅意見表示敬佩，亦預祝佢12月的演唱會成功」。
李八方