《施政報告》一出，係各黨派「成功爭取」橫額出沒嘅最佳季節，但「成功爭取」絕不限於政黨、議員，連被視為建制派「眼中釘」、名譽資深大律師陳文敏（圖）今次都「成功爭取」，皆因佢年初競逐大律師公會執委會時，選舉政綱提出為咗協助年輕嘅大律師，因為政府外聘大律師時候，通常請最好嘅資深大狀，導致年輕大狀冇機會發揮，只可以長期喺最低級法院遊走，所以佢建議資深大律師每年幫政府免費接一單官司，同時政府需聘請一個年資較淺嘅大律師擔任副手，令新人有機會獲取經驗。
《施政報告》噚日就公佈，為咗畀資歷較淺嘅大律師吸取處理案件嘅經驗同技巧，律政司會積極考慮擴大現有委聘經驗不足10年嘅大律師，畀佢哋擔任資深大律師嘅副手安排，律政司亦計劃推出一項練習計劃，畀年輕嘅大律師參與民事法律工作。八方問過陳文敏點睇自己嘅建議獲接納，但未有回覆，可見「成功爭取」唔一定要大張旗鼓。