九西補選將於11月25日舉行，建制派本身計劃由經民聯區議員梁文廣出選，點知中途殺出一個零政績嘅陳凱欣，八方之前一直追問梁文廣會唔會幫陳助選，佢支吾以對。噚日特首林鄭月娥公佈《施政報告》，兩個人預告會夥拍自由黨李梓敬齊齊做facebook live回應。八方見陳好似開籠雀講唔停，話好認同報告內容，但都認為有不足，至於梁文廣都係不時搭一兩句，睇落陳凱欣非常enjoy，不過梁就少少無奈囉。
至於另一參選人劉小麗，噚日亦都同基層市民一齊睇《施政報告》直播，小麗批評今次《施政報告》，民生方面係「越講越廢」、大白象越講越貴，無提及安老政策，更加用覓地建屋去合理化東大嶼人工島填海問題，但又唔提粉嶺高球場等可行嘅方案，而明日大嶼更加係將庫房一鋪清袋。十分滿分，佢只係畀呢份施政報告一分，形容係糖衣都冇，希望進入議會之後可以繼續為市民爭取。