有人計過數，指如果內地有一萬個范爺被追稅，足以摧毀香港樓市。自稱太忙所以唔知自己豪宅僭建而免去一大截稅項的律政司，先生也是熟市之人，剛入市買了一個半山超豪單位。這種時機，堅定唔信「一萬個范爺隊冧市」，司長伉儷心口點止有個勇字。
近日聽到唔少人套現，探路移民，要錢唔要貨，范爺急擲41個物業罰十億的慘烈，感染力強。但身家遠遠少好多個零的普通市民，也有走佬計劃，探問之下，跟馬凱遭釘工作簽證有關。香港人，在超颱山竹的試煉下，充份顯現了，真係好着緊搵食。講明係工作簽證，冇咗工作證即是砸人飯碗。特區政府以林鄭為首，風災後假惺惺叫老闆跟員工互諒互讓，自己卻比無良僱主更無恥，唔使搵劉德華聲演解畫，她的服務對象獨家，只有西環！記協將聯署信交給林鄭，林鄭最佳估算後，肯定黑臉回應。早過佢開聲的屈大媽，紅線綑上身，做了左報頭條。對付一個外國記者，原來「唔拉佢槍斃算係文明」！外媒工作簽證被釘，逃過窮追猛打的林鄭又試指英文回應是waste time嗎？全世界用廣東話學中文的地方只得香港，幾時會拉講外語的記者槍斃？楊局長，你讓子女跳船逃離香港，長遠而言，有避彈優勢！