日前發現死於東平洲嘅棱皮龜，死因懷疑係吞了塑膠物料，環保團體綠惜地球之前進行淨灘行動，喺東平洲執到一個估計係80年代生產嘅1.25升汽水膠樽，印住「No Deposit No Return」（毋須按樽、毋須回樽），反映當年冇回收膠樽嘅做法，亦都顯示，經過30年，膠樽仲未分解到！從事環境風險管理嘅黃兆輝博士呼籲大家珍惜海洋，留意塑膠等垃圾嘅污染，盡量避免將破壞環境嘅化學物質流入大海，下一代先可以繼續享用咁靚嘅環境。
世界自然基金會海洋保育經理楊松頴話，東平洲係巿民同旅客郊遊熱點之一，港人固然係製造垃圾嘅元凶，而東平洲位置靠近內地，雖然冇正式統計，但喺嗰度亦曾經見過唔少寫住簡體字嘅海洋垃圾漂咗過嚟。佢話雖然香港同廣東省合作運行海上垃圾通報警示系統，但比較被動，建議政府同內地喺海洋污染嘅問題上加強合作，教育兩地巿民從源頭減廢。