呢個世界話大唔大，話細唔細，原來好多大纜扯唔埋嘅名人，原來係親戚，好似冇人諗過大導演張堅庭，原來同689狙擊過嘅港大法律學院首席講師張達明係親戚。
兩叔姪同樣敢言
多得教育局局長楊潤雄被指貶低廣東話嘅言論，令到向來關心教育問題嘅大導演張堅庭要再次出嚟表態，佢仲拍埋片放上YouTube反駁楊潤雄，話廣東話對香港人而言，根本唔係優勢唔優勢之分，而係一個需要，唔識廣東話喺香港生活基本上有好多問題。張堅庭言論好多網民讚好，話佢敢言敢講真話。
八方再睇張大導fb，發現佢日前喺自己嘅fb話喎，經過查閱族譜之後，證實港大法律學院首席講師張達明係佢嘅堂叔。又咁啱，佢哋兩位又一齊去咗跑馬地踢波喎，於是60有3嘅張堅庭就叫啲隊友，稱呼55歲嘅張達明做「達叔」，仲話同場嘅波友都鼓勵呢位「達叔」，叫佢守住香港法治城牆咁話。原來唔只「老表」，張堅庭嘅「堂叔」，一樣「你好嘢」。八方睇相，覺得張大導同張達明雖然唔多似樣，但從佢兩個咁敢言嚟睇，有親戚關係又真係唔奇。