2018年度壓軸嘅球壇頒獎禮金球獎，將於12月3日喺巴黎舉行，主辦單位《法國足球雜誌》就公佈咗最後嘅30人提名名單。上屆金球獎由基斯坦奴朗拿度（C朗）大熱勝出，今屆大熱門係皇家馬德里中場兼克羅地亞隊長莫迪歷，呢位33歲中場今年已勇奪世界足球先生同上季歐洲最佳球員等大獎。
另外，今屆新增嘅表揚21歲以下年青球員嘅高柏獎（Troph𥌎e Kopa），10人候選名單亦都正式公佈，其中協助法國取得世界盃冠軍、效力巴黎聖日耳門（PSG）嘅前鋒基利安麥巴比，自然大熱入選；另外利物浦右閘阿歷山大阿諾特、AC米蘭門將基安盧基當拿隆馬、名將之後祖斯甸古華特亦入圍最後10強。