葡萄牙球星基斯坦奴朗拿度（C朗）被指控09年喺拉斯維加斯強姦美國女子Kathryn Mayorga，但C朗嘅屋企人都表達咗對佢嘅支持，佢阿媽同家姐都喺社交網站上載咗C朗身穿超人服裝嘅相（圖），並呼籲網民為正義而轉發。C朗阿媽Dolores同家姐Katia，分別喺fb同ig上載咗C朗嘅超人相，並表示希望睇吓有幾多人有勇氣將張相放喺大頭貼度一星期，並話咁係「為咗葡萄牙、為咗佢、為咗我哋、為咗人民、為咗正義。」另外，西班牙律師Emilio Cortes就話C朗或會被美國當局根據歐洲拘捕令要求引渡，如果佢唔想咁就惟有返去葡萄牙，因為該拘捕令並唔可以用喺喺自己國家生活嘅疑犯。Emilio Cortes話︰「歐洲同美國嘅法律唔同，美國當局可以要求引渡C朗，除非佢係喺葡萄牙。」佢嘅意見對今夏由皇馬轉投祖記嘅C朗或有深遠影響，同祖記簽咗四年合約嘅C朗可能返去葡萄牙比賽，喺祖國結束職業生涯。佢亦指，C朗喺2010年向Kathryn Mayorga支付掩口費，會視為佢承認犯咗罪。