曼聯今季真係多事之秋，領隊摩連奴同主將保羅普巴鬧不和，聯賽八輪已經輸咗三場，要重奪英超冠軍似乎冇乜可能。雖然紅魔上星期六主場以3:2絕殺紐卡素止血，不過摩佬賽後疑似對住鏡頭爆粗，或者會令佢被英足總起訴，面臨停賽處分，最多仲話要停五場咁多。
英國傳媒就話，摩連奴當時沿邊線行去球員通道嗰時，向住攝影機講葡語粗口「fodas filhos de puta」，呢句有「走開！你這狗娘養！」嘅意思。報道又話，英足總已經介入調查，如證實佢當時講嘅嘢有冒犯性或者侮辱成份，摩佬就有手尾跟！最緊要嘅係，紅魔下星期六就要對車路士，摩佬到時就可能要喺觀眾席睇波。
迪基亞唔願續約
雖然負面新聞多多，不過摩佬就有紅魔舊將力撐，踢緊美職聯嘅朗尼就撐摩佬做出氣袋好無辜。朗尼話：「我知道摩佬做咗箭靶，但球員自己都要企番起身，佢哋要承擔責任同埋要有更好嘅表現。雲高爾當年都係咁，所以我私底下同隊友講，我哋一定要踢好啲。」
紅魔嘅衰嘢梗係唔止一單，事關《每日電訊報》話，門神迪基亞唔願意同球會傾續約。迪基亞嘅合約喺季尾到期，但紅魔有權激活合約上面自動續約一年嘅條款，所以迪基亞可以話到2020年夏天先正式完約。不過紅魔滿足唔到迪基亞嘅爭冠欲望，加上摩佬帥位唔穩，所以佢暫時唔想續長約。
一月想簽兩米蘭中堅
其實曼聯方面上個禮拜五已經同迪基亞嘅經理人喺倫敦會面，不過冇就續約達成協議。另外，摩佬亦四出搜羅後衞改善後防，除咗近日盛傳嘅瑞典老將格蘭基斯外，國際米蘭中堅史堅尼亞同AC米蘭中堅阿利斯奧羅馬洛尼，都成為佢嘅頭號目標，一月一定要買到人咁話。