首日報名至今一星期，劉小麗能否過關避過「二度DQ」，至今仍然懸疑未決；雖然生死未卜，劉小麗依舊做好準備，朝朝落區開街站，今朝更獲曾經選過特首，知道「有得揀，先至係老闆」嘅公民黨主席梁家傑協助，喺佐敦開站做宣傳。傑哥喺facebook話，今早有位伯伯同佢握手並指：「見到你我就有希望」，說時還激動得眼有淚光，佢就向伯伯講啦：「我得一個人作用有限，香港係因為有好多哥哥你咁樣對香港不離不棄、唔趨炎附勢、唔忘本、堅持香港嘅核心價值同制度，唔做破壞香港幫兇嘅人，先至係香港有希望嘅理由。」傑哥強調若每個有心嘅港人都做自己可以做嘅事，大家同心協力，香港一定可以捱過去、撐得住，呼籲選民11.25九西補選撐民主派唯一嘅候選人一票。