以前政府有句口號叫做「清潔香港，人人有責」。今時今日，香港條街都唔多乾淨，之但係眼不見嘅各種選舉，同樣十分之揦鮓。有見及此，港大法律系副教授戴耀廷（圖）就發起「清潔香港選舉運動」。八方認為，相當值得大家諗諗。
戴耀廷話近年中共同專制力量透過種票、蛇齋餅糭、劃界、DQ、偷步造勢、𠝹票等等手段「有系統地把香港的選舉搞得骯髒不堪」。如果大家唔想見到他朝有日，香港出現明目張膽買賣選票、預先印定撐建制選票混入票箱、甚至直接改寫結果等，𠵱家就係時候「清潔香港選舉」。
搜集建制干預選舉證據
做法相當之簡單，戴教授話第一步係全港宣傳，大家搜集多啲建制陣營干預選舉嘅證據，公諸於世，喚起大家關注。然後就好似淨化維港咁樣淨化選舉，即係鼓勵多啲希望有潔淨選舉嘅人登記做選民同埋去投票。最後就呼籲國際社會派獨立監察員嚟香港，收阻嚇建制陣營之用。
其實戴教授嘅詳細計劃，經已原文喺《蘋果》出咗街，不過重要嘅事講三次。正如戴教授所講，呢個運動並唔係增加某啲人喺選舉中嘅勝算，而係還香港一個乾淨嘅選舉，所以只要個選舉乾淨，當選嘅係建制派，大家都會欣然接受。八方亦放長雙眼，睇吓建制陣營會唔會又鬧戴教授，事關咁都鬧就係此地無銀㗎喇。