今次「飛站」事件要警方深入調查，但事件喺網上傳開後惹嚟網民議論紛紛，有網民就話從未聽過巴士車長飛站，會俾警方檢控。記者噚日朝早都返番去事發嘅紅樂道巴士站，發現呢個巴士站共有6條九巴路線使用，但期間就有兩架私家車違法泊咗喺巴士站。
市民林先生認為，如果有多架私家車違例泊喺巴士站內，一定會對乘客上落車有影響，「佢（巴士司機）控制唔到個情況，佢都唔想埋唔到站，如果架巴士埋唔到站上落客，責任就喺啲違例泊車嘅司機度」。不過，市民梁小姐（圖）就話未見過有私家車停泊喺紅樂道嘅巴士站內，話如果車長飛站，「佢自己有責任，有其他車喺度都好，巴士可以停前少少，或後少少停低上落客」。
根據《公共巴士服務規例》，任何巴士司機如果有乘客示意佢停車，佢必須喺巴士站停車，畀乘客上落車，違例者可被罰款2,000蚊。