當一個女人愛上返工，究竟可以變成點？香港有個人辦可以畀大家參考，就係聽日將會喺立法會公佈佢任內第二份施政報告嘅特首林鄭月娥（圖）。話說八方問過特首辦，以777票當選特首嘅娥特，上咗任15個月以嚟，究竟放咗幾多日假，結果，與7字結緣嘅娥特，咁耐以嚟原來只放過7日假。
僅689三分一
究竟15個月放7日假，係一個乜嘢概念呢？不如咁，八方話畀大家知，777嘅上一任689梁振英，上任15個月，放咗21日假。講明「愛周末上班」嘅林鄭，除咗放一次假返大陸外遊，全家搭高鐵到桂林外，原來次次放假都係半日起、一日止，7日假期分開慢慢放，全程都係留喺香港。
特首之位，1年有22日年假，離任前就會取消。官場都知，林鄭愛工作不愛放假，仲有傳其實佢喺禮賓府有一個同政府總部特首辦差唔多一樣嘅辦公室。有官員同過八方講，林鄭喺周末、日休假期間，都會向下屬發電郵，幾乎全天候工作。
林鄭上任特首後，曾經喺電台節目透露，自己一日工作16小時甚至17小時，幾乎冇私人時間，佢老公林兆波更形容佢工作到凌晨兩點係「黐線」；而林鄭受訪時都承認，為咗工作犧牲咗家庭，直言冇咗私人生活，至於放假時做啲乜？佢話，最多係留喺禮賓府散步，更引述林兆波形容佢係「越嚟越離譜」。
林鄭聽日發表施政報告後，之後有連場記者會、簡報會，月底仲會出訪日本，睇嚟「放假」對佢嚟講係好遙遠嘅事。
李八方