37歲嘅前英格蘭同埋車路士隊長泰利，禮拜日喺ig宣佈掛靴，結束23年嘅職業球員生涯，泰利回望自己14歲已同車仔簽約，係佢人生中做得最好嘅決定，而據報泰利掛靴後，會再次加盟上季球會阿士東維拉，不過係做準維拉新領隊亨利嘅副手。
13年隊長幫車仔捧15冠
37歲嘅泰利，禮拜日喺ig post長文宣佈掛靴：「經過23年不可思議嘅球員生涯，我認為𠵱家係退役最適當嘅時間。」韋斯咸青訓出身嘅泰利，14歲轉投車路士，98年英聯盃車路士淘汰維拉一戰後備上陣，係佢第一次幫車仔一隊披甲，之後嘅22季，佢只有00年短時間外借去諾定咸森林，其他時間都效力車仔，各項賽事總共上陣717次入67球。
泰利04年起，由時任領隊雲尼亞里委任做隊長，接替退休嘅迪西里，13年間總共幫車仔贏得15項重要錦標，包括五季英超冠軍同埋2012年歐聯冠軍，幾乎車仔創會以來所有重要冠軍，都係由泰利高舉。而泰利喺17年最後一次幫車仔贏聯賽冠軍，季後佢就離隊加盟維拉。上季泰利帶領維拉打入英冠升班附加賽決賽，最後0:1輸畀富咸，呢場波成為泰利職業生涯最後一戰。
傳任維拉準領隊亨利副手
泰利曾經78次代表英格蘭，亦都做過隊長，不過臨尾因為涉嫌種族歧視問題，12年九月退隊。泰利嘅長文中，表示要多謝老婆、兩個小朋友、父母、兄長同埋所有親友嘅支持：「我喺14歲作出最好兼最重大嘅決定，就係同車路士簽約，言語永遠不足以表達車路士每個人對我嘅意義，特別係車仔球迷，佢哋一開始已經支持我，我同大家有好好嘅聯繫同美好回憶。」泰利繼續話︰「我想多謝我嘅隊友、教練、領隊同其他工作人員，我好榮幸喺熱愛嘅球會比賽717場，成為隊長更係莫大榮幸。」
而泰利原本盛傳去莫斯科斯巴達繼續踢波，突然掛靴據報係因為重返維拉做助教，英國《每日郵報》話，亨利即將成為維拉領隊，而佢哋同亨利都希望，未有任何教練經驗嘅泰利先做副手。