民建聯每兩年一度嘅籌款晚會係政界焦點，皆因中聯辦主任送贈嘅字畫，閒閒地都籌到過千萬，就等八方同大家重溫一下。2014年張曉明題字「駿程萬里」，籌到1,380萬元成為熱話；2016年張曉明食過翻尋味，再捐字畫「度德而處」，成交再破紀錄達1,880萬元，「羨煞」其他愛國愛港黨派！
九西補選翌日舉辦
據聞今年民記嘅籌款晚會定咗11月26日喺會展舉行，即係九龍西補選翌日，到底屆時呢場建制派大騷會係慶功宴定解穢酒？還看受颱風「山竹」啟示而有參選意欲、冇地區政績要靠建制黨派抬轎嘅陳凱欣「個人實力」有幾強，但相信西環主任出手相助民建聯嘅情況未必復見，皆因𠵱家西環話事人係王志民，作風同張曉明大不同，應該冇乜嘢捐畀民建聯拍賣。
咁如果身為港澳辦主任嘅張曉明繼續捐字又得唔得？據聞黨內有人認為，兩辦中若然中聯辦冇反而港澳辦有，感覺上唔多好，所以估計機會唔大。
兩辦唔捐咪叫特首辦捐囉，橫掂特首林鄭年初喺民主黨黨慶都贊助咗3萬蚊，據知民建聯唔會要求林鄭捐，之不過林鄭若然要捐，乜銀碼先至凸顯佢對民建聯嘅重視？實在係好大嘅學問！