年屆35歲嘅荷蘭名將雲達華治,喺社交網絡證實已退出國家隊,並會喺周六荷蘭主場對德國嘅歐國聯賽事時,正式同球迷道別。事實上,荷蘭足總早喺上月證實,雲達華治同古積特都會現身喺阿姆斯特丹舉行嘅呢場比賽,賽前會進行儀式,答謝佢哋為國家隊嘅付出。雲達華治球員生涯替荷蘭國家隊上陣達109場,射入25球。呢位曾效力漢堡、皇家馬德里及熱刺嘅中場,現時係丹麥搵食,效力丹超球會阿爾堡。