特首林鄭月娥周三會發表新一份施政報告，多個政黨包括民主黨噚日去政總請願，其中唔少人轉個頭就去咗觀塘發佈海濱音樂噴泉小白象工程民意調查，係乜原因驅使呢班年輕人兩頭揗？係勤力定冇人手啊？
觀塘做社區主任兩年
唔理原因係乜，八方留意當中有位比較生面口嘅小花，打聽下發現係民主黨主席胡志偉嘅徒弟梁翊婷（Edith），落戶觀塘曉麗做社區主任，係明年區選新星之一。
八方問過Edith，佢話噚日請願由志偉班馬，所以好多九東兄弟出席，佢都唔放過機會參加。除咗民主黨力推嘅房屋同基層醫療政策，佢好希望政府關心觀塘區泊車位不足，以至領展㩒住嚟搶嘅慘況等。
啱啱過生日，今年28歲嘅Edith喺網上都相當紅，前財爺曾俊華選特首時Edith係助選薯粉之一，獲網民封為女神。Edith話喺曉麗服務咗年兩年幾，一直跟志偉做嘢，受對方嗰種平實幹勁感動，希望以民生為基礎做嘢，唔係靠樣打明星牌，「想做啲有內涵嘅嘢」。