葡萄牙球星基斯坦奴朗拿度（C朗）冇受到性侵醜聞影響，佢喺上個禮拜六嘅意甲轟入絕妙入球，幫祖雲達斯作客以2:0擊敗烏甸尼斯。祖記意甲八戰全勝高踞榜首之餘，呢一場勝仗將隊史嘅最佳開季紀錄，改寫至各項賽事10連勝！
艾基利：佢好平靜
面對強姦指控嘅C朗最近得到各方力撐，連葡萄牙首相哥斯達都開口支持佢話：「相信每個人都要明白呢一點，無罪假定係存在嘅！C朗係一個非凡運動員，葡萄牙一向以佢為榮。」連首相都撐，C朗自然充滿力量，佢喺呢場對烏甸尼斯嘅比賽正選列陣，表現仲非常活躍，開賽七分鐘已經有一腳射門省中敵衞隻腳，改變方向差啲笠死主隊門將施古費特。
踢到33分鐘祖記先開紀錄，烏拉圭中場賓坦古亞喺一次快速反擊入面，接應後衞祖奧簡斯路嘅右路傳中，衝前頂破施古費特嘅十指關，領先1:0。四分鐘後祖記由C朗拉開比數，佢接應文迪蘇傑左路禁區回傳，第一時間左腳窩利抽入，轟入喺今季意甲嘅第四球。C朗入波之後仲做出自己嘅招牌狼人跳地慶祝，心情簡直靚到爆。
下半場主隊中場安東連巴拿克有一次遠射唔中目標，祖奧簡斯路一次勁射中楣，賽事比數最終都冇改變，祖記贏2:0各項賽事10連勝，係球隊歷來最好成績。
祖記教練艾基利亦都大讚C朗有好表現，佢話：「C朗踢咗一場好波，佢好平靜咁操練，今晚佢入咗非凡嘅一球。」佢亦都話唔會評論C朗嘅私事：「球場以外嘅嘢我唔清楚，因為我唔係同佢一齊住，我喺球場上面見到佢好平靜。佢練習、比賽、入球，呢啲都係重要嘅事情。」
皇馬四場零入球負艾軍
得到C朗嘅祖記就順風順水10連勝，但嗰邊廂舊東家西甲皇家馬德里就認真慘淡，事關佢哋同日喺聯賽作客以0:1輸畀艾拉維斯，連續四場波贏唔到之餘仲要一球都入唔到，教練盧比迪古前途凍過水！全場唯一入波出現喺下半場補時五分鐘，主隊嘅文奴加西亞門前接應隊友頭槌二傳一頂入網，協助球隊攞晒三分。