跑贏施政報告先出台，民間特首劉德華撐老董指點江山那個東大嶼填海計劃，「聲演」而冇瞓身唔收片酬親自落場拍，算係交差找了半條數。另一個民間特首發哥，真金白銀拍英皇與阿里巴巴聯乘的電影「無雙」，際此風頭火勢，我好戥發哥心驚肉跳，陰陽合同呢樣強國產物，有追溯期嘛。片中內地女主角一出場又係叫觀眾個心離一離，妝容沒有最白只有更白，乍看幾乎是范爺翻版。日頭冇講人，夜晚無講神，貴為娛樂界女神的范爺落得消失123日的下場，對面膜控的她而言確係災難。罰款十億代替牢獄，計吓條數，只係傳聞身家中的七份一，賺咗啦。「無雙」內容講美金偽鈔，如果劇情後段將美金換成人仔，落力造假，阿里巴巴還敢落注？傷同胞感情事小，污衊中國事大！當下中美貿易戰唔知點收科，假鈔，會不會應運而生？范爺坦白從寬，自揭收到一億的片酬當中，其實只得五百萬係真嘢，咁算唔算逃稅？回到「無雙」的時代背景，加拿大警察隻身來港追捕假鈔集團，女警對他說「你唔能夠喺度越境執法喎」。一地兩檢已成事實的今天，有戲就好睇，有山就好行。發哥，正戲。